Nagpapanjari Khalifatul Ard
In Bismillahi Allahu Rabbul Izzat
Yan Mahakawasa Dunya Akhirat
Wajib katu' hatihun Siya ha Sifat
Tiya'gahan in kumannal pa Zat
In Puunan Kakkal di' madawhat
In Zatullah sapantun Siya Gusi
Nakatapuk ha Tampat Mahasutsi
Lindurandam danan Nagpapanjari
Kugkuyag kalasahan in makahati
Amun Adam Tau Khalifatul Ardi
Dungdung iban panduga ha Zahir
Harus unahun ingatun ha pamikir
Tantuhun ha Akkal ha Bukun-Ghayr
In Ujudullah ha manusiya' Nagkabir
Dayng ha Kaawal langkus pa Akhir
Mustahil ha Allah Way Siya Kaawn
Hangkan subay tuud paratsayahun
Tagnaan ha katan unu-unu batukun
Sabab nahut-aslag yan tantu Awn
In katan piyapanjari ayat pipikilun
Quran-Hadis Himumungan limpal
Ayat katanda'-tandaan Sabunnal
Pitung-lapis langit gumi matampal
Ha manusiya' bar-iman hipakannal
Mahinang dan sin sila Halul Akkal
Ginisan ha utan langit-gumi nyata'
Ganapdukun Ayat nasabbut Tanda'
Kakitaan sin mata iban atay tugila'
Misalan sin Allah ha mga manusiya'
Sampay nila katusian iban mukarna'
Panggawgut wiyajib sin Parman
Tiyap-tiyap sumba ha Katunggalan
Ha alup pagtag-ipun wajib in ihsan
Bang awn bulirapat subay kakitaan
Luba'labi ha yaqin subay kananaman
Di' subay hikapag-inuinu in kasuuk
Labi dayng ugat ha liug bang mabatuk
Ha waktu kumannal subay mahinnuk
Pantun kalahi baran ha bud puntuk
Iban jantung ma'rifa ha Allah haruk
Rahasaiya' nagngan Sir ha Ginhawa
Damikkiyan Sifat Kasabunnalan Niya
Ingatun ha Baran yan in Ma'rifatullah
Daakan wajib unahun awwal agama
Bat way kashirik ha ibadat iban sumba
Hadis namayta' Ginhawa hipapaham
Karna' ha Mohammad duun in Qallam
Kaawliyaan ha Ginhawa naglakam
Muqali' Kamaasan gawgut numanam
Ginhawa iyusul timagna' kan Adam
Panghati tammatun ha way kakupul
Ha Insanul Khayr bayta' Quran Qawl
Himumungan, atay, piil subay buntul
Kaput Muqali' Kamaasan Tausug purul
Bunnalun iban bawgbugan sakaummul
Baktulan Akhir Zaman
No comments:
Post a Comment